الاثنين، 9 يوليو 2012

نصائح لزوجتي (علشان ترجعي قبطية)


زوجتي قبطية أباً عن جد وقضت كل حياتها في الكنيسة, وأصبحت خادمة في مدارس الأحد من أكتر من 15 سنه.
ولكن من ساعة ما عرفتها وهي لا تسلك سلوك الأقباط, فقررت أنصحها بخبرتي إذاي ترجع للقطيع وتبقي قبطية فعلاً.

يا ريهام:

- علشان ترجعي قبطية لازم تنشري علي الفيس بوك كل يوم علي الأقل خبر عن الإسلاميين وتتريقي عليهم وتهاجميهم بأشد الألفاظ , ولما تقري خبر مماثل عن الكنيسة تتجاهليه أو تريحي نفسك وتقولي أنه كدب.

- علشان ترجعي قبطيه فعلاً لازم ضميرك يبقي أعور تشوفي اللي ليكي بس , لما الإسلاميين يعملوا حاجه غلط تبهدلي الدنيا وتبكي وتتحسري علي الحق والفضيلة, ولما الكنيسة تعمل حاجه غلط تقولي أكيد دي حكمه أنا مش فاهمها.

- علشان ترجعي قبطية لازم لما تقرأي كلام ربنا عن بني إسرائيل أنهم أغبي من الحمار والثور وقساة ويعبدوه بفمهم فقط, ميجيش في بالك أن كل الكلام ده موجه للأقباط دلوقتي وتفتكري أنه موجه لناس كانوا عايشين زمان مش لينا.

- علشان ترجعي قبطية لازم تقرأي أغلب كلام المسيح عن الكتبة والفريسين والكهنة ومعلمين الشعب ونفاقهم وعبادتهم الشكلية وإدمانهم للطقوس وتضليلهم للشعب, وتسمعي وعظات وتفسيرات وتشتركي في دراسة الكتاب عن الكلام ده علي أساس أن دي حكايات من 2000 سنه للتسلية, وطوال حياتك ميجيش مره واحده في بالك أن الكلام ده مقصود بيه رجال الكهنوت والكنيسة الأن.

- علشان ترجعي قبطية لازم تصدقي أي تأليف لأي معجزة بالعافيه والمفروض كمان تساعدي في نشرها وتزودي عليها كمان, ولو حد أتجنن وشغل عقله وضميره وشكك تتهميه أنه قليل الإيمان وبيبلبل الناس وضد الكنيسة وممكن تزوديها وتقولي عليه بروتستانتي.

- علشان ترجعي قبطية لازم تقولي أنك لا تؤمني بعصمة البابا زي الكاثوليك بس لو حد حمار جاهل قال أن البابا غلط في موقف معين تبهدليه وتدافعي وتهاجمي وتشككي وتتهمي الجاهل ده عدو البابا والكنيسه والمسيح.
- علشان ترجعي قبطية لازم تنقي كلام من الكتاب المقدس أكنك بتنقي رز التموين, أي كلام يثبت رأيك تكتبي الأيات بشواهدها وتحطيها في وش التخين, أي كلام يكشف نفاقنا وضلالنا وضميرنا عدي عليه وفوتيه, ولو حد زنقك وكتبلك أيات من دي قوليله دي مكتوبه لظروف معينه ولناس تانيه, وتنصحيه يتوب ويصلي علشان ربنا يخليه قديس زيك.

- علشان ترجعي قبطية لازم تهيني الحق والأخلاق والضمير وتعتبريهم خدامين عندك, لما الكنيسه تبوس جذم الخطاة الأشرار وتمدحهم وتقول عليهم بالباطل ناس كويسين وبيحبونا تهللي للحكمة والمحبة المسيحية, ولو الإختيار بين شفيق ومرسي تقولي علي شفيق راجل محترم وزي الفل والبابا كان بيحبه.

- علشان ترجعي قبطية لازم لو لقيتي حد بيفكر بعقله وبضميره ومش بيوافق علي تأليف المعجزات وعلي أخطاء الكنيسة الي ودت شعبها في داهيه, تقوليله أنت بتعثر الناس وبتدين وتعمليله إرهاب وتعوجي كلام ربنا بالعافيه علشان يخاف ويبطل هرطقة.

- علشان ترجعي قبطية لازم تتكلمي عن الطوايف وعن العقيده واللاهوت وتأكدي علي أن طايفتك هي الأصح وأن الطوايف التانيه هبل ويا ريت تحضري مؤتمر تثبيت العقيدة برعاية الأنبا بيشوي.

- علشان ترجعي قبطية لازم تعاملي المسلمين كويس جداً علشان أنتي جبانه خايفه منهم وعلشان تثبتيلهم أنك أحسن منهم, ولكن تعاملي الأقباط اللي زيك بطريقه زباله.

- علشان ترجعي قبطية لازم تزوري دير كل شهرين مره علي الأقل, وتقولي أنا رايحه اخد بركه وفي الحقيقة أنتي رايحه تتفسحي, ولازم يكون عدي عليكي شال قديم مش نضيف أسمه شال المعجزات لأبونا فلان, وأنتي ماسكه الشال في شبرا بتاخدي منه بركه تكلمي واحد في أسوان يقولك أن معاه الشال وعمل معاه معجزه حالاً.

- علشان ترجعي قبطية لازم تحطي شوية يهودية علي شوية إسلام علي قليل من المسيحية وتضربيهم مع بعض, والي يطلع تسميه قبطية.

- علشان ترجعي قبطية لازم تكوني جبانه ومنافقه وظالمه وعبده وضميرك أعور ومتكبرة ومتصنعة للتقوي والتواضع ومدعية للقداسة بالباطل.

- علشان ترجعي قبطية لازم تمارسي الأركان الأربعة للأقباط (الصوم – الإعتراف – التناول – النفاق) وبعد كده أعملي الي أنتي عايزاه بضمير مرتاح.

نصيحتي الخالصة المُحبة: أوعي تسمعي النصايح دي وترجعي تبقي قبطية.

خليكي زي ما أنتي مسيحية
ملحوظة:
أي واحد مسلم هيقرأ الكلام ده ويتبسط ويحس بالنشوه والسعاده, يبص في المرايه زي ما أنا بصيت, لو قدر.

ليست هناك تعليقات:

إرسال تعليق